Тармоқларда Жиззахда мактаб бош ҳисобчиси ўз жонига қасд қилгани ҳақида хабарлар тарқалди. Шундан сўнг вилоят прокуратураси бунга муносабат билдирди.
Таъкидланишича, ушбу ҳодиса 2019 йилда содир бўлган. Жиззах шаҳридаги 22-сонли ихтисослаштирилган давлат умумтаълим мактабининг бош ҳисобчиси 2019 йилнинг 21 ноябрь санасида ўз уйида ўзини осиб қўйган. Прокуратуранинг маълумотига кўра, у ишлаган мактабда 2010—2019 йиллардаги молиявий хўжалик фаолияти юзасидан ҳужжатли тафтиш ўтказилган. Унинг натижасига кўра мансабдор шахслар томонидан қарийб 160 миллион сўмлик бюджет маблағлари ўзлаштириш ва растрата қилиш йўли билан талон-торож қилингани аниқланган ва жиноий иш қўзғатилган, тергов бошланган.
Бош ҳисобчининг ўлимида бирор-бир шахснинг ҳаракатларида жиноят таркиби бўлмагани учун жиноят иши қўзғатиш рад этилган. Шунингдек, у вафот этгани учун унга нисбатан қўзғатилган иш ҳам 2020 йил 30 июнида тўхтатилган.
Шунингдек, мактаб директори қилган ишидан қаттиқ пушаймонлиги, биринчи марта унча оғир бўлмаган жиноят содир этгани, айбига тўлиқ иқрорлиги ва моддий зарарни тўлиқ қоплагани учун унга қўзғатилган иш ҳам тугатилган.
Ушбу ҳодиса юзасидан директорнинг хўжалик ишлари бўйича ўринбосари ЖКнинг 167-моддаси (ўзлаштириш ёки растрата йўли билан талон-торож қилиш) 2-қисми «а, б, в, г» бандлари ва 209-моддаси (мансаб сохтакорлиги) 2-қисми «а» банди билан айбли деб топилиб, 2020 йил 24 сентябрда унга ҳукм ўқилган.
