Фарғонада кўршапалак уясини саратон касалига даво деб, фуқарони 15 300 долларга чув туширган шахс қўлга олинди. Бу ҳақда "Дарё" хабар қилди.
Фарғона вилояти Учкўприк тумани Ёйилма қишлоғида фуқаро М.Б. ИИБ бошлиғи номига ариза билан мурожаат қилиб, қўқонлик Ш.М. уни алдаб 15 300 долларини қўлга киритганини маълум қилган.
Аризада қайд этилишича, 2018 йилнинг октябрида Қўқон шаҳрида яшовчи 1993 йилда туғилган Ш.М. кўршапалак уяси саратон касалига даво эканлигини айтиб, унинг яшаш хонадонига елим идишга ўралган нарсани олиб келган. Уни алдаб, қурилиш материалидан ишланган нарсани «кўршапалак уяси» деб берган. Эвазига унинг 15 300 доллар (125 583 012 сўм) пулини фирибгарлик йўли билан қўлга киритган.
Терговга қадар текширув даврида тўпланган ҳужжатларга кўра, фуқаро Ш.М.нинг ҳаракатларида Жиноят Кодексининг 168-моддаси 4-қисми «а» бандида (жуда кўп миқдорда фирибгарлик) кўрсатилган жиноят аломатлари борлиги аниқланди. Унга нисбатан мазкур модда билан жиноят иши қўзғатилиб, тергов ишлари тугатилиб, иш судга юборилди.
Аввалроқ фарғоналик "афсунгар" беморни жинлар билан учраштираман деб чув туширган эди.
