Ижтимоий тармоқларда тарқалган видеоларда ҳайдовчиларнинг Тошкент марказида дрифт қилаётгани, шундан сўнг автомашиналардан бири ЙТҲга учрагани акс этган. Мазкур воқеага Тошкент шаҳар ИИБ матбуот хизмати изоҳ берди.
Қайд этилишича, 17 апрел куни соат тахминан 22:30 ларда Истиқлол кўчаси бўйлаб бир нечта автомашиналар хавфли манёврлар амалга ошириб, фавқулодда вазият юзага келган.
“Нексия-3” русумли автомашинани бошқараётган 23 ёшли М.Н. бошқарувни йўқотиб, йўл четидаги металл устунга бориб урилган. Тўқнашувда ҳайдовчи жабрланмаган, бироқ ИИБга хабар бермай воқеа жойидан қочиб кетган.
Йигитга нисбатан маъмурий баённома тузилди. Қолган транспорт воситаларининг ҳуқуқбузарлик содир этган ҳайдовчиларининг шахси аниқланмоқда.
