Бу галги ялпи мажлисда Тошкент вилояти ҳокимининг ҳисоботини эшитиш назарда тутилган.
Сенат Раиси Мазкур масалани муҳокамага тайёрлаш жараёнида жойлардаги долзарб ижтимоий - иқтисодий масалаларни комплекс ҳал этиш бўйича қатор вазирлик ва марказий идоралар томонидан тегишли ишлар олиб борилмаётганини таъкидлади.
“Хусусан, Давлатимиз раҳбарининг 2018 йилнинг январида вилоятга амалга оширган ташрифлари давомида вазирликлар, идоралар, хўжалик бошқаруви органлари ва тижорат банкларининг Тошкент вилоят бошқармалари ҳамда ташкилотларини Нурафшон шаҳрига кўчириш вазифаси қўйилганэди.
Орадан бир йилу уч ой вақт ўтганига қарамасдан, фақат вазирлик ва идораларнинг 20 га яқин бошқармалари Нурафшонга кўчирилмаганини қандай изоҳлаш мумкин ?” деди у ўз сўзида.
Айниқса, молия, солиқ, статистика, бандлик ва меҳнат муносабатлари, халқ таълими, соғлиқни сақлаш, ветеринария назорати бошқармалари каби тузилмаларнинг амалда кўчирилмагани:
биринчидан, вилоят ҳокимлиги учун кўплаб қийинчиликлар ва муаммоларни келтириб чиқармоқда;
иккинчидан, мазкур тузилмалар бевосита масъул ва жавобгар бўлган соҳалардаги айнан ҳудудларга хос бўлган, аҳолини ташвишга солаётган муаммоларни ўз вақтида ҳал этишга сунъий тўсиқ бўлмоқда;
учинчидан, бошқарув самарадорлигини ошириш, давлат идораларини халққа яқинлаштириш ишларига бевосита салбий таъсир кўрсатмоқда.
