O‘zLiDeP вакилларининг ташрифи доирасида «Единая Россия» партиясидаги қатор муҳим йўналишлар раҳбарлари ва масъул ходимлари билан ўзаро фикр алмашилди.
Ўзаро манфаатли шерикликнинг қатор истиқболли йўналишлари ва икки томонлама қизиқиш уйғотадиган бошқа масалалар бўйича ўтказилган партиялараро маслаҳатлардан сўнг O‘zLiDeP ва «Единая Россия» ўртасида ўзаро ҳамкорлик қилиш тўғрисида келишув имзоланди. Ушбу ҳужжат Ўзбекистон Республикаси ва Россия Федерацияси ўртасидаги тенг ҳуқуқли ва ишончли ҳамкорликка таянган ҳолда, ўзаро ҳурмат, бир-бирларининг ички ишларига аралашмаслик, ишончли ва ўзаро манфаатли шерикчилик тамойилларига асосланади.
Масалан, Келишув доирасида партия қурилиши соҳасида қўшма маслаҳатлар ўтказиш, тажриба алмашиш, экспертлар учрашувларини ташкил этиш ва шу каби бошқа тадбирларни амалга ошириш ишлари янада фаоллаштирилади. Партиялараро, жумладан ишбилармон доира вакиллари ўртасидаги алоқаларни минтақавий даражада кенгайтириш, партия шафелиги остида жойлардаги инвестициявий ва бизнес муҳитини намойиш этадиган турли семинарлар, анжуманлар ва “давра суҳбатлари” ўтказишга алоҳида эътибор қаратилиши режалаштирилган.
Томонлар дўстлик ришталарини мустаҳкамлаш, ёшларни ватанпарварлик ва меҳнатсеварлик руҳида тарбиялаш мақсадида ёшлар ва хотин-қизлар партия ташкилотлари ўртасидаги ўзаро манфаатли ҳамкорликни ривожлантиришга кўмаклашадилар.
Келишув Ўзбекистон томонидан O‘zLiDeP Сиёсий Кенгаши Ижроия қўмитасининг раис ўринбосари Б.С. Якубов, Россия томонидан «Единая Россия» Партиясининг Бош кенгаш Котиби ўринбосари А.А. Климов томонидан имзоланди.
Умуман олганда, мазкур ҳужжат ҳар икки партиянинг партиялараро алоқаларга Ўзбекистон ва Россия ўртасидаги ҳамкорликнинг муҳим таркиби сифатида қараб, ушбу ҳамкорликни янада кенгайтириш ва чуқурлаштиришга кўмаклашишдек хайрли ниятларининг амалий ифодасидир.
