Давлат хавфсизлик хизмати Ўзбекистон - Қозоғистон чегара постида жиноий гуруҳдан жабр кўрганлардан алоқага чиқишни сўрамоқда.
Эълон матни фейсбукдаги "Халқ билан мулоқот" гуруҳига жойлаштирилди.
Аввал хабар берилганидек, жорий йилнинг 5 август куни Ўзбекистон Республикаси Давлат хавфсизлик хизмати ва Давлат божхона қўмитаси ҳамкорлигида Тошкент вилояти божхона бошқармасига қарашли “Яллама” чегара-божхона постига туташ ҳудудда ўтказилган тезкор тадбир давомида жисмоний шахслар ва божхона ходимларидан иборат жиноий гуруҳ фаолияти фош этилган эди.
Ушбу жиноий гуруҳ аъзолари Ўзбекистон - Қозоғистон давлат чегарасида жойлашган “Яллама” чегара-божхона постидан юк автотранспорт воситаларини навбатсиз ва тезлаштирган ҳолда ўтказишни ваъда қилиб, автотранспорт воситалари ҳайдовчиларидан ҳамда тадбиркорлардан тамагирлик йўли билан мунтазам равишда пул олиб келишган.
Ҳозирда мазкур ҳолат юзасидан Жиноят Кодексининг тегишли моддаларига мувофиқ жиноят иши қўзғатилиб, тергов ҳаракатлари олиб борилмоқда.
Ҳурматли фуқаролар!
Агарда Сиз ушбу жиноий гуруҳ аъзоларидан жабр кўрган бўлсангиз, (+99871) 259-35-40, (+99890) 950-04-40, (+99897) 443-00-22 телефон рақамларига мурожаат қилишингизни сўраймиз, дейилади эълонда.
