«Артикходжаевнинг ҳаракатларида жиноят аломатлари мавжуд эмас» – Бош прокуратура шаҳар ҳокими ва «Кун.уз» ўртасидаги можаро юзасидан баёнот берди

«Артикходжаевнинг ҳаракатларида жиноят аломатлари мавжуд эмас» – Бош прокуратура шаҳар ҳокими ва «Кун.уз» ўртасидаги можаро юзасидан баёнот берди
Ўзбекистон Республикаси Бош прокуратураси Тошкент шаҳар ҳокими Ж.Артикходжаев ва “Кун.уз” журналистлари ўртасида юзага келган, ижтимоий тармоқларда кенг муҳокама сабаб бўлган вазият юзасидан расмий баёнот берди. Қуйида уни ҳавола этамиз.
“Ижтимоий тармоқларда тарқалган Ж.Артикходжаевга тегишли аудиоёзувдаги ҳолатларни текшириш юзасидан баёнот

Жорий йилнинг 16 ноябрь куни Интернет нашрларида Тошкент шаҳар ҳокими, сенатор Ж.Артикходжаевга тегишли ҳамда ҳақорат, таҳдид мазмунидаги аудиоёзув тарқалди.

Мазкур ҳолат оммавий ахборот воситалари, блогерлар, сиёсий партиялар, энг ачинарлиси, айрим хорижий экспертлар ҳамда халқаро ташкилотларнинг кескин танқидий муҳокамаларига сабаб бўлди.

Бош прокуратура томонидан мазкур ҳолатга ҳуқуқий баҳо бериш мақсадида ЖПКнинг 329-моддасига асосан терговга қадар текширув ўтказилди.

Аниқланишича, жорий йилнинг 14 август куни “Kun.uz” таҳририятига “Хива строй” МЧЖ раҳбарининг бажарилган қурилиш ишлари учун буюртмачидан пул ундиришга оид мурожаатини ўрганиш мақсадида мазкур таҳририят мухбири Р.Исроилов ва оператори Ш.Эгамбердиевлар Олмазор туман ҳокимлигига боришган.

Туман ҳокими ўринбосари А.Вахабов давлат хизматчиси бўла туриб, тегишли одоб-ахлоқ қоидаларига зид равишда Р.Исроиловга тушунтириш беришдан бош тортган, улар билан қўпол муносабатда бўлган ҳамда операторнинг видеотасвирга олишига қаршилик кўрсатган.

Мазкур воқеанинг эртасига “Kun.uz” таҳририяти ушбу видеолавҳани ўз сайтида эълон қилган ва бу кенг муҳокамаларга сабаб бўлган.

Шу куни кечқурун Тошкент шаҳар ҳокими Ж.Артикходжаевнинг вазиятни юмшатиш ва муросага келиш тўғрисидаги топшириғига асосан шаҳар ҳокимлигининг Ахборот хизмати раҳбари Л.Сабирова, туман ҳокими ўринбосари А.Вахабовлар таҳририят вакиллари Б.Ахмедов, Р.Исроилов ва Ш.Эгамбердиевлар билан шаҳар ҳокимлиги биносида учрашишган.

Унда А.Вахабов ножўя ҳаракатларга йўл қўйганлигини тан олган ва таҳририят ходимларидан узр сўраган. Бироқ, бу ҳолат таҳририят ходимларини қониқтирмаган.

Учрашув якун топгач, мулоқот иштирокчилари бинонинг йўлагида Ж.Артикходжаевга тасодифан дуч келишади. Л.Сабирова Ж.Артикходжаевга бўлиб ўтган суҳбат ҳақида маълумот бериб, “Kun.uz” ходимлари А.Вахабовнинг узридан қаноатланмаганлигини баён қилган.

Шунда Ж.Артикходжаев улар билан мулоқотда муомала маданиятидан четга чиққан ҳолда, интернет нашрларига нисбатан ўзининг салбий муносабатини ифодалаб, гўёки уларни шармандали вазиятларга тушириш имкониятига эгалигини, лекин у бундай тарбияланмаганлиги ва буни хоҳламаслигини билдирган.

Ушбу жараённи “Kun.uz” мухбири Б.Ахмедов “Журналистлик фаолиятини ҳимоя қилиш тўғрисида”ги Қонун талабларига зид равишда, учрашув иштирокчиларини огоҳлантирмасдан телефонига хуфёна ёзиб олган ва таҳририятга тақдим этган.

Ўз навбатида, таҳририят томонидан ноқонуний йўл билан олинган ахборот йўқ қилинмаган. Оқибатда 2019 йил 16 ноябрда ҳоким Ж.Артикходжаевни обрўсизлантириш мақсадида аудиоёзувнинг ножўя сўзлардан иборат бир ярим дақиқалик қисми (учрашув икки соат давом этган) монтаж қилиниб, номаълум шахс томонидан ижтимоий тармоқларда тарқатилган.

Бу ҳолат ўз навбатида оммавий ахборот воситаларида кенг муҳокама бўлишига сабаб бўлган.

“Kun.uz” таҳририяти ўз айбини англаган ҳолда, ҳақиқий ҳолатни маълум қилиш учун аудиоёзувнинг Ж.Артикходжаевга тегишли қисмини тўлиқ эълон қилган.

Терговолди текширувида аниқланишича, Ж.Артикходжаев давлат ҳокимияти ва бошқаруви органи мансабдор шахси бўла туриб, давлат хизматчисининг одоб-ахлоқ қоидаларига риоя қилмасдан, ҳақоратли ва қўпол сўзларни ишлатган.

Бироқ, унинг ножўя сўзлари умумий тарзда айтилгани, муайян шахсга қаратилмаганлиги, реал таҳдид йўқлиги боис, Ж.Артикходжаевнинг ҳаракатларида жиноят аломатлари мавжуд эмас.

Шу сабабли ЖПКнинг 83-моддаси 2-қисмига асосан жиноят иши қўзғатишни рад қилиш ҳақида қарор қабул қилинди.

Шунингдек, “Kun.uz” таҳририяти ходимлари Ж.Артикходжаевга нисбатан даъво ёки эътирозлари йўқлигини баён қилишди.

Лекин Ж.Артикходжаев Вазирлар Маҳкамасининг 2016 йил 2 мартдаги 62-сон қарори билан тасдиқланган “Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари”ни бузганлигини инобатга олиб, унинг интизомий жавобгарлиги масаласини кўриб чиқиш учун Ҳукуматга мурожаат қилинди.

Шунингдек, таҳририятнинг мазкур воқеалардаги иштироки юзасидан тегишли муносабат билдириш учун ваколатли орган Ахборот ва оммавий коммуникациялар агентлигига хат юборилди” – дейилади расмий баёнотда.

Ўхшаш янгиликлар

  1. fahri-2016 6 декабр 2019 17:25
    Ўша Ж.Артикходжаев ўрнида оддий халқ вакили бўлганда ушбу ҳолат мутлақо тескари ҳолатда талқин қилинган бўлармиди? Янаям худо билади. Замонга тескари борган билан фойдаси йўқ!
  2. Узбек 28 ноябр 2019 08:53
    Огзи кийшик булса хам бойнинг боласи гапирсин. Халк маколини энди англадим. Пулнинг кучи ва "продажный"лар замони келди
  3. эмир 27 ноябр 2019 12:46
    инсонга билдирмай овозини езиш душманни иши ким булишидан катти назар буларга халк душмани деб караш керак
  4. Реалист 27 ноябр 2019 12:33
    Гитлер хам ўз қўли билан хеч кимни ўлдирмаган,аниқ бир шахсга тахдид қилмаган,демак у хам оппоқина эканда,шармандаликни чўққисига чиқиб бўлдингларми,хой прокураторлар.Қонунлар фақат оддий одамлар учун,амалдорга қонун йўқлигига яна бир марта
    гувох бўляпмиз.Хукуматга ишонч нольга тушди.
Янгиликка фикр ёзиш чоп этилган кундан 30 кун ичида мумкин.

Сўнгги янгиликлар

Самарқанд давлат университетида Наврўз сайллари

Самарқанд давлат университетида Наврўз тантаналари эрта тонгдан бошланиб, байрам сайлларига уланиб кетди. Миллий куй-қўшиқлар, бетакрор...
20-03-2024, 10:14

Самарқанд давлат университетида “ХХI аср психологияси: муаммолар, ютуқлар, инновациялар” мавзусида халқаро конференция ўтказилди…

Халқаро психология фанлари академияси билан ҳамкорликда ўтказилган анжуманда Россия, Қозоғистон, Белоруссия, Озарбайжон давлатларидан 30 га...
16-03-2024, 08:15

Россиялик машҳур физик олим Самарқанд давлат университетида бўлди…

Самарқанд давлат университетига Россия Фанлар академиясининг академиги Владислав Хомич ташриф буюрди. Машҳур физик олим билан Самарқанд...
15-03-2024, 08:13

Самарқанд давлат университети Италиянинг Саленто университети билан ҳамкорлик қилади

Самарқанд давлат университетига Италиянинг Саленто университети ректори Фабио Поллисе бошчилигидаги делегация ташриф буюрди. Мартабали...
14-03-2024, 08:11

Ҳиндистонлик профессор Самарқанд давлат университетида фаолият кўрсатмоқда…

Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов ҳиндистонлик...
10-03-2024, 08:09
Ўзбекистон янгиликлари » Сиёсат » «Артикходжаевнинг ҳаракатларида жиноят аломатлари мавжуд эмас» – Бош прокуратура шаҳар ҳокими ва «Кун.уз» ўртасидаги можаро юзасидан баёнот берди