Истеъфодаги подполковник Тожиддин Одилов Самарқандда бундан бир неча йиллар аввал содир бўлган воқеа, ҳудуддаги машҳур ўғри учлик "Шурик, Гаррик, Махно"ларни қўлга олгани ҳақида айтиб берди. Бу ҳақда EVERYDAY.UZ мухбири постда.уз маълумотига таяниб хабар берди.
Ўша пайтларда машҳур учлик Самарқандда жуда кўп жиноятлар - талончилик, ўғрилик ва номусга тегиш каби ишларни қилган. Уларни ушлаш ва асл исм фамилияларини билиш мушкул бўлган. Чунки бу номлар уларнинг лақаблари бўлган. Кунларнинг бирида Самарқанд вилоят ИИБга маҳкумдан хат келган. Унда маҳкум ўша учликни танишини, улар билан жиноят содир этганини ёзган. Лекин Одилов бунга ишонмаган ва жавоб хатида қирққа яқин савол йўллаган. Маҳкум эса уларга жавоб берган. Нега уларни сотяпсан кабилидаги саволга маҳкум учлик уни алдаб кетгани, барча айбни бўйнига олиб қамалса ундан хабар олиб туришни ваъда берган, лекин сўзининг устидан чиқмаганини ёзган. Шу сабабдан ҳам маҳкум ўша пайт узоқ муддатли қамоққа ҳукм қилинган бўлган.
Шундан сўнг Гаррик ва Махнони ушлаш қийин бўлмаган, лекин уларнинг раҳбари Шурикни ушлаш мушкул бўлган. Шурик дастлаб у вилоятдан бу вилоятга қочиб юрган ва охир оқибат Қозоғистонга қочган.
Шундан сўнг ИИБ ходимлари қидирувни тўхтатган ва бундан Шурик хабар топган. Шундай кунларнинг бирида Шурикни қариндошларидан бири юбилей тадбирига таклиф қилган. Қидирув тўхтатилганини билган Шурик эса бунга рози бўлган. Истеъфодаги подполковник Шурикни қайси йўл билан келишини таҳмин қилиб уни ушлаш пайига тушган. ИИБ ходимлари оддий йўловчи образига кириб, юбилейга бораётгандек кўрсатиб уни машинада бирга боришга кўндирган ва йўлда яна бир ходим йўловчи бўлиб чиқиб, унга қочиш имконияти қолдирмаган.
– Шурик, саргузашт тугади, ҳибсдасан, дедим ва машинани туман ИИБга ҳайдадим... – дея ҳикоя қилди истеъфодаги подполковник Тожиддин Одилов.
