Аввалроқ Қашқадарё вилояти ҳокими вилоятнинг чегарадош ҳудудидаги қишлоққа боргани ҳақида хабар берган эдик.
Шундан сўнг депутатлар ҳам фаолликни оширди. Хусусан, вилоятдан Олий Мажлис Қонунчилик палатасига сайланган депутат, ЎзЛиДеП фракцияси раҳбари Актам Хаитов Шаҳрисабз ҳамда Деҳқонобаддаги чекка қишлоқларга борди.
У дастлаб Шаҳрисабзнинг энг чекка қишлоқларидан бири “Мироқи”да бўлди. У ерда аҳоли муаммоларини тинглаб, уларни ечиш борасида амалий ишлар қилинди. Қуйидаги видеолавҳада партия раҳбарининг қишлоқда амалга оширган ишлари тасвирланган.
Шундан сўнг Хаитов Деҳқонободдаги қишлоқларда ҳам бўлди. У ерда юзма-юз мулоқотлар давомида фуқаролар томонидан асосан ишга қайта тиклаш, иссиқхона ташкил этиб тадбиркорлик фаолиятини бошлаши учун имтиёзли кредитлар ажратиш, электр энергиясидаги ва газ таъминотидаги муаммоларни бартараф этиш ва бошқа қатор масалалар кўтарилди. Эътиборлиси, муамоларнинг салмоқли қисми шу ернинг ўзида ҳал этилди.
Хаитов аҳоли билан мулоқотда энди ҳар бир хонадонга кириб боришини, муаммони билиш учун ҳар бир шахс билан суҳбат қуриш кераклигини, энди қуруқ ваъдалар билан иш битмаслигини айтди.
Депутатнинг халқ билан мулоқоти, жойларга ташрифи давом этмоқда.
