Президент Шавкат Мирзиёев 8 март байрамига бағишланган тадбирда нутқ сўзлаб, бугунги кун замонига мос равишда ишлай олмаётган раҳбарлар ҳақида гапирди.
"Қанча-қанча гапирамиз, "кечагича яшаш бўмайди, ҳозирги шароитга ўрганинглар, одамлар билан гаплашинглар" десак ҳам яна ўша эскича ҳаракатлар. Бизга ярашмаган сўзлар билан маҳалла раисларига, фермерларга муносабат қилгани учун (Миришкорнинг соби ҳокими Бахтиёр Ражабов - таҳр.) дарров эшиттим ва ўша куни ишдан олиб ташладим. Ким бўлишидан қатъий назар ҳозирги шароитга муносиб бўлмайдими, халқимизни Сиз деб ҳаракат қилмаса мен билан ҳамнафас бўлмайди. Ўзининг меҳнати, ақли, ширин адолатли сўзи билан ишонтира олса мен билан ҳамнафас бўлади", - деди давлатимиз раҳбари.
Эслатиб ўтамиз, Қашқадарё вилояти Миришкор туманининг собиқ ҳокими Бахтиёр Ражабов мажлисда маҳалла раисларини сўккан аудиоси тарқалган ва шунинг ортидан лавозимидан бўшатилган.
