Президент Шавкат Мирзиёев бугун, 12 март куни Хоразм вилоятидаги “Ҳазорасп” ЭИЗга борди.
У ерда яратилаётган шароитлар, ишга туширилган ва янги корхоналар билан танишди. Маълум бўлишича, иқтисодий зонада бугунги кунда 1100 кишидан ортиқ киши иш билан таъминланган. Умумий қиймати 306 миллион доллардан зиёд бўлган, жумладан, 266 миллион доллардан ортиқ тўғридан-тўғри хорижий инвестициялар эвазига, умумий ҳисобда 19 та лойиҳа амалга оширилмоқда.
Хусусан, Президентимиз “Develop Textile” корхонаси фаолияти билан ҳам танишди. У ерда бугунги кунда 760 та иш ўрни яратилган бўлиб, йилига 4 минг тонна бўялган тайёр чоксиз трикотаж мато, 14 миллион дона турли хил тикувчилик маҳсулотлари ишлаб чиқарилмоқда. Президентимиз бу каби замонавий компанияларни кўпайтириш орқали вилоятда етиштириладиган пахта хомашёсини тўлиқ қайта ишлаш, фақат тайёр маҳсулот экспорт қилиш зарурлигини таъкидлади.
