Бугун, 28 апрел куни Президент Шавкат Мирзиёев Бухоро вилоятининг Олот тумани марказида аҳоли билан суҳбатлашди.
Президент учрашувда талофатдан кўрилган зарарни қоплаш учун қанча керак бўлса шунча маблағ берилишни таъкидлади.
“Биронта хонадон, корхона, фермерга зарар етказмаймиз. Ғалла бузилган жойда пахта экамиз. Меҳнат қиламиз, жипслашамиз. Мен ҳамма қарорларни қабул қилдим, ҳеч қандай зарар бўлмайди”, – деди давлатимиз раҳбари.
Шавкат Мирзиёев асосийси ваҳимага тушмасдан, одамларни сақлаш кераклигини айтди.
“Худонинг ўзи асрагани – агар кундузи бўлганда бу нарса кўп одамни йўқотиб қўйган бўлар эдик. Одамлар саросимага тушиб қоларди. Кечаси одамлар ичкарида бўлгани учун қариндошимизни, фарзандимизни, неварамизни, қўшнимизни йўқотмадик”, – дея қўшимча қилди Президент.
Президент кучли шамол натижасида вафот этган Ашуровнинг оиласига ёрдам берилишини алоҳида таъкидлади.
Эслатиб ўтамиз, Бухорода 27 апрель оқшомида кузатилган ёмғир аралаш кучли шамол оқибатида 41 киши тан жароҳати олган ва бир киши ҳалок бўлган.
