Бугун Сирдарёда содир бўлган воқеадан сўнг Президент Шавкат Мирзиёев воқеа жойига етиб боргани ҳақида хабар берган эдик.
Шундан сўнг Ҳукумат комиссияси ташкил этилиб, талофатдан жабр кўрганларни хавфсиз ҳудудга кўчириш бўйича топшириқ берилди. Президентимиз Оқолтин туманида аҳоли билан учрашди ва ҳеч ким эътибордан четда қолмаслигини таъкидлаб, барчага зарур ёрдам берилишини айтди.
– Бу ҳеч ким кутмаган синов. Биринчи ҳаракатимиз одамларни эҳтиёт жойларга кўчириш бўлди. Энг катта масала – ўлим бўлмаслиги. Оқсоқоллар, маҳалла раислари ва нозирларидан илтимос қиламан: одамларни йиғиб, уйларга, палаткаларга жойлаштириб, озиқ-овқат билан таъминлаб, маҳаллама-маҳалла саранжом қилиб олишимиз керак. Бунинг учун ҳамма куч ва воситаларни сафарбар қиламиз. Шароит яхши бўлмагунча биронта раҳбар кетмайди. Сабр қилиб, оғирликни елкамизга олиб, чидашимиз керак. Биронта хонадон, биронта одам эътиборсиз қолмайди, – деди Шавкат Мирзиёев.
Тезкор чора тадбирлар кўрилиб у ерга мутахассилсар жалб қилинди. Шунингдек, аҳолини эвакуация қилиш ишларига Мудофаа вазирлиги шахсий таркиби ва махсус техникалари ҳамда Ички ишлар вазирлиги ва Миллий гвардиянинг Сирдарё ва Жиззах вилоятлари ҳудудий бошқармалари жалб қилинди.
Прездент аҳоли билан учрашгач Сардоба сув омбори тўғони очилган жойга бориб, уни кўздан кечирди.
Ҳозирда тўғондан сув чиқиши тўхтаган. Тошган сув оқими Оқолтин туманидан ўтувчи Абай каналига туширилиб, Жиззах вилоятидаги Арнасой кўлига йўналтирилган.
Президентимиз вазиятни шахсий назоратга олган.
Давлатимиз раҳбари Сирдарё вилоятида бўлиб турибди.
