Ёдгорлик мажмуаси Тошкент шаҳрининг Ғалаба боғида ташкил этилди. Ушбу боғ икки қисмдан иборат бўлиб унинг биринчисида ўзбекистонликларнинг жанглардаги иштирокидан лавҳалар, иккинчисида фронт ортидаги республикамиз ҳаёти акс этган. Давлат раҳбари Олмазор туманида 12 гектардан зиёд жойда ташкил этилган ушбу ёдгорлик мажмуасига келиб, гулчамбар қўйди.
"Бу Ўзбекистондаги барча оналарга қўйилган ҳайкал. Ушбу ёдгорлик бутун халқимиз учун қутлуғ зиёратгоҳга, оила, муҳаббат, вафо ва садоқат тимсолига айланиб қолади. Бу ерга келган ёшлар миллатимизнинг қонида бўлган фазилатларни англаб, уларни қадрлаб яшашга интилади", - деди Шавкат Мирзиёев.
