Айни пайтда интернет сайтлари ва ижтимоий тармоқларда Олий Мажлис Қонунчилик палатаси депутати Расул Кушербаевга нисбатан айблов уюштириш билан боғлиқ хабарлар тобора авж олиб бормоқда. Шу масала бўйича ЎзЛиДеП вакили, А.Алимов муносабат билдирди.
Партия вакилининг муносабати www.uzlidep.uz сайтида эълон қилинди.
"Айни шу масалада депутатнинг ўзи ҳам ижтимоий тармоқлардаги саҳифаларида тушунтириш бериб ўтди.
Шу ўринда бир нарсани таъкидлаб ўтмоқчи эдик. Ўзбекистон Республикаси Олий Мажлиси Қонунчилик палатаси депутати даҳлсизлиги тегишли қонунлар билан ҳимоя қилинади. Унга амалга ошираётган фаолияти туфайли бирор бир шаклда даҳл қилишга ҳеч кимнинг хаққи йўқ.
Ўз навбатида мавжуд қонунчиликка тўла риоя этган ҳолда, берилган ваколатлар доирасида хизмат вазифасини амалга ошираётган ҳар бир депутатимизни нафақат кўп минг кишилик сайловчилари, балки депутатликка номзодини илгари сурган сиёсий партия ҳам тўлиқ қўллаб-қувватлайди.
O'zLiDePдагилар Р.Кушербаевни айнан мана шундай ҳар бир масалада ўзининг қатъий позициясига эга бўлган, шу билан бирга ўз ваколатларини суиистеъмол қилишдан бутунлай йироқ депутат сифатида билади. Шунинг учун ҳам партия унинг номзодини иккинчи бор Қонунчилик палатаси депутатлигига кўрсатган.
Яна бир гап. Бугунги кунгача Ўзбекистон Республикаси Олий Мажлиси Қонунчилик палатаси, O'zLiDeP Сиёсий Кенгаши ёки партиянинг парламентдаги фракциясига ҳуқуқни муҳофаза қилувчи ёки бирор бошқа идоралар томонидан депутат Р.Кушербаев фаолиятда йўл қўйилган бирор қонун бузилиш ҳолатлари юзасидан мурожаатлар келиб тушмаган.
Депутат ўз меҳнат фаолиятини белгиланган иш режаси асосида амалга оширмоқда", - дейилади партия вакилининг муносабатида.
