Шавкат Мирзиёев бугун сардобаликлар билан учрашув давомида сув омборида юз берган техноген авария жуда катта синов бўлганини, Ҳукумат комиссияси ташкил этилиб, тошқин оқибатларини бартараф этишга барча куч ва имкониятлар сафарбар қилинганини яна бир бор қайд этди.
Президент ишларни ташкил этиш ва сирдарёликлардан хабар олиш мақсадида бугун тўртинчи марта келганини таъкидлади.
"Ҳар соат, ҳар дақиқа бу ердаги ишлар ҳолатини суриштириб турибман, телефон орқали ҳисобот оляпман", - деди Шавкат Мирзиёев.
Давлат раҳбари аҳоли турмуш шароитни тиклаш асосий вазифа эканини айтиб, зарарланган уйлар қайта таъмирланаётгани ва янги уйларни қуриш бошлаб юборилганини маълум қилди.
Шунингдек, Шавкат Мирзиёев таъмирланаётган уйлар ва янги қурилаётганлари ҳам давлат томонидан бепул қуриб-таъмирлаб берилишини билдирди. Одамлар янги кўп қаватли уйларга ва таъмирланган уйларига шу йил 1 сентябргача тўлиқ кўчиб ўтиши маълум қилинди.
"Шу билан бирга, уйлари зарарланган одамларнинг илгариги ҳовлилари ҳам ўзларида қолади", – деди Президент.
Аввалроқ Президент аҳоли билан учрашувда уларга пул маблағларини тарқатгани ҳақида хабар берган эдик. Сардобада сув тошқинидан 4,5 мингдан зиёд хонадон эгалари зарар кўрган ва ҳар бир хонадонга 40 миллион сўмлик моддий ёрдам, шунингдек, телевизор, музлатгич, кир ювиш машинаси, минипеч, электр чойнак ва дазмол каби маиший техникаларҳам совға қилинди.
