Сардоба фожеаси айбдорларининг тўлиқ исми-шарифлари қачон эълон қилиниши маълум қилинди. Бу ҳақда бугун бўлиб ўтган пресс клубда Бош прокурор матбуот котиби Ҳаёт Шамсутдинов ахборот берди.
Шамсутдинов “Сардоба” сув омбори фожэаси юзасидан қўзғатилган ва ДХХ томонидан олиб борилаётган жиноят иши юзасидан асосий 4 та тергов версияси бўйича тергов олиб борилаётганини таъкидлади. Булар, лойиҳалашдаги хатоликлар, қурилиш меъёрларига риоя этмаслик, эксплуатация жараёнидаги хатоликлар ва табиий офат. Шунингдек, Бош прокуратура вакили тергов қанча вақт давом этиши ҳамда айбдорларнинг исми-шарифи қачон очиқланланиши ҳақида ҳам сўз юритди.
"Биронта бир ҳолат бўлса одамлар бир пасда айбдорларни топиб унга жазо тайинлаб, ҳукм ўқиб юборишади. Бу албатта нотўғри. Ҳеч бир шахс айби исботланмагунча, суд ҳукми кучга кирмагунча, айбдор ҳисобланмайди. Бу Конституция билан кафолатланган. Жиноят процессуал кодексининг талабига кўра ҳар қандай жиноят иши 3 ой муддатдан ошмаган ҳолда тергов тамомланиши лозим. Зарурат бўлган пайтда бу муддат 5-7 ойгача узайтирилиш мумкин. Тергов давомида барча зарур ҳаракатлар амалга оширилади, мақбул далиллар тўпланади. Бу иш бўйича (Сардоба фожеасмҳи - таҳр.) 170 шахс сўроқ қилинди. Ўша пайтда айбдор шахслар доираси аниқланади ва тегишли тартибда уларга айб эълон қилинади ва жиноят иши тамомланиб, айблов хулосаси билан судга мазмунан кўриб чиқиш учун юборилади", - деди Шамсутдинов.
Бош прокуратура вакили ЖПКда одил судловни фақат судлар амалга ошириши белгилаб қўйилганини айтиб, жиноят иши судга юборилгандан кейин суд томонидан кўриб чиқилиб, тергов давомида тўпланган далиллар мақбуллиги текширилиб, айбдорларнинг ҳар бирига ҳуқуқий баҳо берилиб, жазо тайинланиб, ҳукм чиқарилишини билдирди. Ҳукм қонуний кучга киргандан кейингина айбдорларнинг исм фамилиялари кенг оммага эълон қилиш мумкинлиги маълум қилинди.
