Президент Шавкат Мирзиёев бугун Андижоннинг Марамат туманидаги “Водий ҳамкор агрофирмаси” корхонасига борди. У ерда Шавкат Мирзиёев қуёнчилик кластери фаолияти билан танишди.
Маълум бўлишича, бу корхона 1 майда 1 гектар майдонда ишга туширилган. У ерда “Калифорния”, “Янги Зеландия”, “Фландер”, “Рекс” ва “Великан” зотли 1000 бош қуён олиб келинган. Бир йилда уларнинг сонини 30 мингга чиқариш режалаштирилган.
Ўша ерда Президентга чорвачилик, паррандачилик, балиқчилик корхоналари салоҳияти ҳақида маълумот берилди.
- Андижонда чорва кам, гўшт бошқа жойлардан олиб келиняпти. Қуён, парранда, балиқ кўпайтирилиб, гўшти истеъмолга чиқарилса, вилоятда гўшт нархи тушади. Камбағал оилаларга тарқатилиб, кластерлар томонидан қайта сотиб олинса, уларга даромад бўлади. Иқтисодий комплекс ва сектор раҳбарлари шу билан шуғулланиши керак, - деди Шавкат Мирзиёев.
Шунингдек, давлат раҳбари вилоятда омихта ем ишлаб чиқаришни кўпайтириш ҳамда қуёнлар сонини 1 миллионга етказиш бўйича топшириқ берди.
