Сенат ялпи мажлисида Андижон, Бухоро, Навоий, Наманган, Фарғона ва Тошкент вилоятларида ўтказилган ўрганишлар мазкур ҳудудлардаги 167 мактаб мўрили чўян ва қўлбола печкалар билан иситилаётгани танқид қилинди. Бошқа вилоятларда ҳам аҳвол бундан яхшироқ эканлигига ҳеч ким кафолат бермайди, дея хабар қилмоқда EVERYDAY.UZ мухбири ЎзА ахборотига таяниб.
- Болаларнинг соғлиғига ва ҳатто ҳаётига хавф соладиган, уларда сурункали касалликларни келтириб чиқарадиган бу муаммони бартараф этиш бўйича Халқ таълими, Соғлиқни сақлаш вазирликлари қандай ташаббус ёки талаб билан чиқди?, -деди Сенат раиси Н.Йўлдошев. - Агар бундай ташаббуслар, мисол учун, Молия вазирлигига киритилган бўлса, бу вазирлик қандай чоралар кўрди? Бу ҳолат эртага мудҳиш оқибатларни келтириб чиқармаслигига ким кафолат беради?
Ҳолбуки, ижтимоий тармоқларда ва фавқулодда вазиятлар тузилмаларининг ахборотларида ис газидан заҳарланишнинг аянчли ҳолатлари тўғрисидаги маълумотлар тез-тез тарқатилмоқда.
Сенат раиси бу каби муаммоларни бартараф этиш зарурлигига алоҳида эътибор қаратди.
