“Uzbekistan Airways” нуфузли хорижий компания бошқарувига бериилиш мумкин. Бу ҳақда бугун, 25 май куни Ўзбекистон президенти Шавкат Мирзиёев ўтказган йиғилишда маълум қилинди.
Йиғилишда транспорт соҳасининг барқарор ишлашини таъминлаш ва изчил ривожлантириш масалалари муҳокама қилинди. Маълум қилинишича, пандемия даврида транспорт корхоналари 340 миллиард сўм зарар кўрган. Вазият яхшиланмагунча бу рақамлар яна ошиши мумкинлиги айтилди. Айниқса, карантин чекловлари даврида “Uzbekistan Airways” ва “Uzbekistan Airports” акциядорлик жамиятлари энг кўп зарар кўради. Шу сабабдан ҳам уларнинг 122 миллион доллар кредитлари тўлов муддатлари узайтирилди, 60 миллиард сўмлик солиқ имтиёзлари тақдим этилди. Инқирозга қарши курашиш жамғармасидан 50 миллион доллар миқдорида айланма маблағ сифатида фоизсиз ссудалар ажратилди.
Шунингдек, йиғилишда рақобатни кучайтириш учун фуқаро авиацияси бозорига янги ташувчиларни жалб қилиш, “Uzbekistan Airways”ни нуфузли хорижий компания бошқарувига бериш масаласи кўриб чиқилди.
Аэропортларни модернизация қилиш, Андижон, Бухоро, Урганч ва Қарши халқаро аэропортларини давлат-хусусий шерикликка бериш бўйича тендер эълон қилиниши белгиланди.
