Бугун, 26 май куни Ўзбекистон президенти Шавкат Мирзиёев иштирокида йиғилиш ўтказилди. Унда мамлакатда коронавирус пандемиясига қарши кураш бўйича амалга оширилаётган ишларга тўхталиб ўтилди.
Хусусан, давлат раҳбари бозорлар, савдо комплекслари, банкларда ижтимоий масофага амал қилмаслик, кўча-кўйда тиббий ниқоб тақмаслик, бемалол ва хотиржам бўлиб, уйларда турли тадбирлар ўтказиш ҳолатлари кўпайётганини танқид қилди.
Президент бундай ҳолатлар пандемияга қарши курашда амалга оиширилаётган ишларнинг ҳамда бюджетдан олинаётган триллионлаб харажатларнинг натижадорлигини йўққа чиқараётганини таъкидлади.
“Республика комиссияси вилоят ҳокимлари билан бирга бир кун муддатда эпидемиологик вазият ёмонлашган ҳудудларнинг тоифасини қайта кўриб чиқсин ҳамда карантин чораларини кучайтириш бўйича таклиф киритсин”, – деди Шавкат Мирзиёев.
Шунингдек, Соғлиқни сақлаш вазирлигига “қизил” ва “сариқ” ҳудудларда кунлик тест олиш сонини ошириш бўйича топшириқ берилди. Бунда айниқса тиббиёт муассасалари, бозорлар, банклар ва аҳоли кўп жойларда назорат тестлар олишни кўпайтириш кераклиги таъкидланди.
