Ўзбекистон Президенти Шавкат Мирзиёев бугун Сергели туманидаги 329-умумий ўрта таълим мактабга борди.
Давлат раҳбари у ерда яратилган шароитлар билан танишди. Президент матбуот хизматининг хабар қилишича, мактаб Президент мактаблари тажрибасидан фойдаланилган ҳолда қурилган. У ерга директор танлов асосида, ўқитвучилар эса тест натижаларига кўра ишга олинган. Шунингдек, ушбу мактабда ўқувчилар касбга йўналтирилиши ҳам маълум қилинди.
Шавкат Мирзиёев мактабга ташрифи давомида мактаб дарсликлари савияси талабга мутлақо жавоб бермаслигини, ўқув дастурларини илғор хорижий билимлар асосида такомиллаштириш зарурлигини таъкидлади.
- Ўғил-қизлар ҳунар ўрганса, ўзига ишончи ортади, дунёқараши ҳам ўсади, ота-онасининг ҳам кўнгли тўқ бўлади. Кейинчалик ижтимоий муаммоларни бартараф этишга маблағ сарфламаслик учун бугун шу маблағни мактабларга беришимиз керак. Болаларимизни ватанпарвар, жамиятга керакли инсон қилиб тарбияламасак, келажакка хиёнат қилган бўламиз, - деди Шавкат Мирзиёев.
Шу билан бирга, Президент мактабдаги мусиқа хонасига борганда бир таклифни ўртага ташлади.
- Ҳар бир ўғил-қиз ҳеч бўлмаса битта чолғу асбобини чалишни билишини истардим, - деди давлат раҳбари.
