Бугун, 3 июнь куни Ўзбекистон Президенти Шавкат Мирзиёев раислигида йиғилиш ўтказилди. Унда камбағалликни қисқартириш масалалари муҳокама қилинди. Бу ҳақда Президент матбуот хизмати хабар қилди.
Хусусан, йиғилишда эҳтиёжманд оилаларга ажратилган ёрдамлар манзилга етиб бермаётгани таъкидланди.
"Бугунги кунда боқувчисини йўқотган оилалар сони 155 минг, 5 нафардан ортиқ фарзанди бор кам таъминланган оилалар сони 81 минг, ёлғиз яшовчи кексалар 16 минг нафарни ташкил этмоқда. Лекин ажратилаётган ижтимоий ёрдамлар эҳтиёжмандларга тўлиқ етиб бормаётган ҳолатлар ҳам кўп.
Шу боис Маҳалла ва оилани қўллаб-қувватлаш вазирлигига қўшимча ажратилган 992 миллиард сўм маблағни ҳамда “Саховат ва кўмак” жамғармасидаги 70 миллиард сўм қолдиқни муҳтож оилаларга аниқ ва адолатли етказиш бўйича қатъий топшириқ берилди.
Пандемия даврида аҳолини ижтимоий қўллаб-қувватлаш бўйича қабул қилинган қарорлар доирасида йил якунига қадар қўшимча 235 мингдан зиёд оилага моддий ёрдам ажратилиши қайд этилди", - дейилади матбуот хизмати ахборотида.
