Бугун Шавкат Мирзиёев раислигида ёшлар ва хотин-қизлар бандлигини таъминлаш масалалари бўйича видеоселектор йиғилиш бўлиб ўтди.
Йиғилишда давлат раҳбари мактабни битирган ўқувчиларнинг билими ҳақида гапирди.
“Ёшлар мактабдан кетди мактаб раҳбарлари эътиборсизлиги билан нимага шунча 11 йил ўқитиб уларга касб бермаганимизга ким жавоб беради деган савол ҳаммамизни қийнаши керак. Шу сабабли мактабнинг юқори синфларидаёқ касбга ўқитиш тизимини жорий этиш ҳаётнинг ўзи бизга мажбур қиляпти. Агар шуни қилмасак болаларимизни тарбия қила олмаймиз. Уларга шароит ярата олмаймиз.
Мактабнинг олдига савол қўйишмиз керак: Нимага ота-она репетитор топиб, боласини олий таълимга киритяптию, нимага давлат шунча пул сарфласа-да, мактаб битирувчиларининг 50 фоизи ҳам олий таълимга кирмаяпти?”, –деди Президент.
Шавкат Мирзиёев ушбу масалани депутатлар қонуний томонини кўриб чиқиши кераклигини айтди. Президент бу талабларни бундан 3, 5, 10 йил олдин қўйиш имконияти бўлмаганини таъкидлади.
“Ўқитувчи ҳам, ўқувчи ҳам 3 ой пахта, 1 ой чопиқ, 15 кун пилла ва кўча супириш билан овора эди. У пайтлар бу масалани қўя олмас эдик. Ҳозир бу нарсалар йўқ-ку мактабда. Энди талаб қўйишга вақт соати келди десак, бу ҳам тўғри бўлади”, – дейди Шавкат Мирзиёев.
