Бош прокурор Тошкентдаги 1700дан ортиқ дорихоналар раҳбарлари расман огоҳлантирилганлигини маълум қилди. Бу ҳақда кун нашри хабар қилди.
Маълум бўлишича, кеча президент раислигида бўлиб ўтган йиғилишда Бош прокурор Ниғматилла Йўлдошевга муҳим топшириқлар берилган. Хусусан, дорихоналарда дори-дармонларга, тиббиёт воситаларига бўлган эҳтиёжни тўлақонли қондиришга алоҳида эътибор қаратиш бўйича алоҳида топшириқ берилган. Йўлдошев бу бўйича қилинган ишлар хусусида қуйидагича маълумот берди.
"Бу борада кечанинг ўзида прокуратура органлари томонидан Тошкент шаҳридаги мавжуд 1700дан ортиқ дорихоналар раҳбарлари расман огоҳлантирилди.
Коронавирусдан профилактика қилиш учун 5 турдаги ва касалликни даволашга мўлжалланган 9 турдаги мажбурий тартибдаги дори воситаларини камида 1 ой, ёки 2-3 ойлик захирасини тўлиқ таъминлаш ва уларни арзон нархларда аҳолига сотиш тартиби ҳам жорий қилинди", - дейди Бош прокурор.
Аввалроқ президент раҳбарларга дори воситаларининг нархи устидан назорат ўрнатиш бўйича топшириқ берган эди.
