Ўзбекистонда давлатга хоинлик қилган икки кишига суд ҳукми ўқилди. Бу ҳақда Олий суд хабар қилди.
Маълум бўлишича, икки фуқаро - А.Ярбабаев ва Е.Ярбабаевалар ЖКнинг 157-моддаси (давлатга хоинлик қилиш) 1-қисмида назарда тутилган жиноятни содир этганликда айбланган. Уларнинг иши бўйича суд бир неча ой давом этган. Ҳарбий судда сўнгги суд жараёни бўлиб ўтган ва тўпланган барча далилларга кўра уларга суд ҳукми ўқилган. Ярбабаев ва Ярбабаевалар юқоридаги жиноятни содир этганликда айбли деб топилган ва А.Ярбабаевга 11,5 йил қамоқ жазоси тайинланган.
Е.Ярбабаевага эса ЖКнинг 57-моддаси қўлланиб, 6 йил муддатга озодликдан маҳрум қилиш жазоси тайинланган. Лекин унинг тергов ва судда жиноятларни фош этишга фаол ёрдам берганлиги ва ишдаги бошқа жавобгарлигини енгиллаштирувчи ҳолатларни эътиборга олиб, суд тайинланган жазони ўтамасдан туриб ҳам унинг хулқини назорат қилиш орқали тузатиш мумкин, деган қатъий фикрга келди ва 3 йил синов муддати белгиланган ҳолда шартли равишда жазодан озод этилган.
Олий суд ахборотида ушбу икки фуқаро ҳақида бошқа тафсилотлар берилмаган.
