Кеча, 17 июль куни Президент Шавкат мирзиёев раислигида видеоселектор йиғилиши ўтказилди.
Унда Президент пандемияга қарши курашишда барча масъулият ҳокимлар ва секторлар раҳбарлари зиммасида эканини айтди. Бунинг учун уларда ўз ҳудудларидаги мавжуд вазият ҳақида тўлиқ ва ҳаққоний маълумотлар бўлиши, улар ҳар куни, ҳар соатда янгиланиб бориши кераклиги таъкидланди.
Шавкат Мирзиёев ушбу раҳбарлар ҳамда барча мутасадди ва масъулларнинг мияси соат механизмидай куну тун, аниқ ва бехато ишлаши лозимлигини айтди.
“Афсуски, биз кўпинча мана шу масалаларда оқсаяпмиз. Қўлимизда аниқ маълумот, асосланган таҳлилий материаллар йўқлиги туфайли қабул қилган қарорларимиз кутилган натижани бермаяпти. Бу масалада қандай ёрдам зарур бўлса, марҳамат, айтинглар, барчасини ҳал қиламиз. Чунки мақсад битта: тезроқ бу балодан қутулиб, иқтисодиётимизни, ижтимоий ҳаётимизни тўлиқ тиклаб олишимиз керак”, – деди Шавкат Мирзиёев.
