ИИВ вазири илк бор қамоқхоналардаги маҳкумлар сони ва меҳнатга жалб қилинган маҳкумларга қанча ойлик тўланиши ҳақида гапирди. Пўлат Бобожонов ЎзА’га берган интервьюсида бу ҳақда маълум қилди.
Вазирнинг айтишича, бугунги кунда Ўзбекистонда 43 та жазони ижро этиш муассасаси ва 11 та тергов ҳибсхонаси мавжуд. Хусусан, жазони ижро этиш муассасаларининг 18 таси ёпиқ турдаги колония ва 25 таси манзил-колония ҳисобланади. Бугунги кунда эса жазони ижро этиш тизимидаги маҳкумлар сони 22,9 минг нафарни ташкил этмоқда. Бу эса ўз навбатида ҳар 100 минг аҳоли сонига нисбатан 67 нафар шахс тўғри келишини англатади.
Шунингдек, вазир жазони ижро этиш муассасаларига қарашли корхоналарда 100 дан ортиқ турдаги маҳсулот ишлаб чиқарилаётганини маълум қилди. 2019 йил ва шу йил бошидан бери маҳкумларни ишга жалб қилиш орқали 3 минг 559 янги иш ўрни яратилиб, 1минг 352 нафар маҳкум меҳнат бозорида талаб юқори бўлган касбларга ўқитилган ва уларга тегишли сертификатлар берилган. Хусусан, 2020 йилнинг ўтган 7 ойи мобайнида шундай корхоналар томонидан 100,4 миллиард сўмлик маҳсулот ишлаб чиқарилгани айтилди. У ерларда меҳнат олиб бораётган ҳар бир маҳкумга ўртача 700-800 минг сўм, айрим мутахассисликлар бўйича эса, 1,5-2 миллион сўмгача ойлик маош берилиши маълум қилинди.
