Депутатлар бандлик бош бошқармаси ходими томонидан тақдим этилган маълумотларни қониқарсиз деб топишди

Халқ депутатлари Наманган вилоят Кенгашидаги ЎзЛиДеП депутатлик гуруҳининг навбатдаги йиғилиши бўлиб ўтди.

ZOOM дастури орқали ўтказилган йиғилишда Наманган вилоятида кичик бизнес ва хусусий тадбиркорликни янада ривожлантириш орқали янги иш ўринларини яратиш ва аҳоли бандлигини таъминлаш шунингдек тадбиркорлик, жумладан, оилавий тадбиркорликни ривожлантириш учун банк кредитлари ажратилиши юзасидан амалга оширилаётган ишлар ҳамда вилоят аҳолисини тоза ичимлик суви билан таъминлаш масалалари бўйича соҳа мутасаддиларининг ҳисоботлари эшитилди.

Сир эмаски, бугунги кунда аҳолининг тоза ичимлик сувига бўлган талаби тобора ортиб бормоқда. Сув таъминотини яхшилаш борасида Республика бюджетидан ажратилган маблағлар ҳисобига 4 та объектларда ичимлик ва оқава сув иншооти ҳамда тармоқлари қурилиш ишлари олиб борилмоқда. Масалан, Поп туман, Иттифоқ МФЙ ҳудудида сув иншооти қурилиши, Чодак МФЙда магистрал ичимлик сув тармоғи қурилиши ҳамда Наманган шаҳри “Юксалиш” МФЙ ҳудудидаги Исломобод шаҳарчасида аҳолини ичимлик суви билан таъминлаш кўзда тутилган.

Йиғилиш давомида кўрилган кейинги масала банклар фаолияти, имтиёзли кредитлардан фойдаланишдаги муаммо ва тўсиқлар муҳокамасига бағишланди. Хўш, фаол тадбиркорлик, инновацион ғоялар ва бунёдкорлик салоҳиятини қўллаб-қувватлаш орқали аҳолига муносиб ҳаёт шароитларини яратиш, ишбилармонлик муҳитини яхшилаш, энг муҳими ёшларни тадбиркорликка жалб этиш орқали аҳолига қандай имтиёзли кредитлар ажратилмоқда?

Қайд этилганидек, жорий йилда “Оилавий тадбиркорликни ривожлантириш” дастури асосида вилоятдаги барча тижорат банклари томонидан кичик бизнес ва оилавий тадбиркорликни ривожлантириш учун 23869 нафар аҳоли ва тадбиркорларга 528,7 млрд сўм имтиёзли кредитлар ажратилган.

Йиғилишда кўрилган учинчи масала - вилоят Бандлик бош бошқармаси ходими томонидан тақдим этилган маълумотлар эса депутатлар томонидан қониқарсиз деб топилди.

Йиғилиш якунида камчиликлардан тўғри хулоса чиқариб, уларни аниқ режа ва босқичма-босқич ҳал этиш чоралари бўйича таклифлар билдирилди.

Шунингдек, Ўзбекистон Республикаси давлат мустақиллигининг 29 йиллигига тайёргарлик кўриш ва уни муносиб тарзда ўтказиш, “СЕН ҚУДРАТ МАНБАИ саодат маскани жонажон Ўзбекистон” шиори остида ҳудудларда сайловчилар билан учрашувлар ташкил қилиш бўйича вазифалар белгилаб олинди.