Ўзбекистон президенти бугун пойтахтда метрополитеннинг Юнусобод йўналишида амалга оширилган ишлар билан танишди.
Президент матбуот хизматининг хабар қилишича, давлат раҳбари “Бодомзор” бекатидан янги “Туркистон” бекатигача поездда борган. У ерда амалга оширилган ишларни кўздан кечирган. Шавкат Мирзиёев ушбу янги йўл ҳаракатни, иқтисодиётни ва ҳаётни тезлаштиришини таъкидлади.
Давлат раҳбари умумий қиймати 103,8 миллион доллар бўлган ушбу лойиҳа тарихи ҳақида гапирди.
“Бу йўлни қуриш осон бўлгани йўқ. Маблағ топиб, чет элдан мутахассислар олиб келиб, лойиҳани синчиклаб кўриб чиқдик. Икки йил давомида қурилиш бўлди. Энг муҳими, бу транспорт арзон, хавфсиз, қулай”, – дейди Президент.
