Ўзбекистон адлия вазири Русланбек Давлетов тизимдаги энг коррупциялашган бўғин нотариуслар бўлганини маълум қилди. У бу ҳақда Коррупцияга қарши курашиш мавзусида бўлиб ўтган матбуот анжуманида гапириб ўтди.
Вазир 3 йил олдин нотариусларда коррупция авж олганини айтди. Бунга у ердаги бюрократия, ходимлар ойлигининг камлиги ва шаффоф иш юритилмагани сабаб қилиб кўрсатилди. Шу билан бирга, Давлетов у ерда коррупциянинг олдини олиш учун қилинган ишлар хусусида ҳам гапириб ўтди. Вазирнинг маълум қилишича, бўғинда коррупцияни йўқотиш учун шаффоф тизим яратилган, бюрократиянинг олдини олиш учун электрон ҳужжат алмашинувига ўтилган ва ходимларнинг ойлиги 2-3 бараварга оширилган. Шунингдек, ҳар бир нотариус идорасига қоғоз, ручкасигача таъминлаб берилгани таъкидланди.
“Адлия тизимида кадрларни ишга олишда танлов тизими йўлга қўйилди. Кимни ишга олишни комиссия ҳал қилади. Саволларни беришда билет тизимига ўтилди, комиссия аъзоси олдиндан келишилган саволни бера олмайди, яъни алоҳида алгоритм ишлаб чиқилди. Нотариат тизимида шу ёндашув орқали кадрларни ишга олганимизда уларнинг фаолияти юзасидан биронта шикоят тушмади”, – дейди вазир.
