Аввал хабар қилганимиздек, бугун давлатимиз раҳбари Нукусга бориб, Жўқорғи Кенгеснинг навбатдан ташқари сессиясида иштирок этди. Унда Қорақалпоғистонга янги раҳбар сайланган эди.
Президент матбуот хизматининг маълум қилишича, йиғилишда Республикани ривожлантиришнинг 10 та устувор йўналишлари белгилаб берилган. Улар қуйидагилар.
1. Туманлар ва маҳаллаларни жадал ривожлантириш.
2. Аҳоли бандлигини таъминлаш ва камбағалликни қисқартириш.
3. Инвестиция лойиҳалари амалга ошириш.
4. Орол муаммосининг салбий таъсирини юмшатиш.
5. Хизмат кўрсатиш соҳаси салоҳиятини тўлиқ ишга солиш.
6. Қишлоқ хўжалигини ривожлантириш.
7. Аҳолини уй-жой билан таъминлаш.
8. Ижтимоий инфратузилмани ривожлантириш.
9. Ёшлар ва аёлларни қўллаб-қувватлаш.
10. Жиноятчиликнинг олдини олиш.
Шунингдек, йиғилишда Республикадаги 16 та туманда 2 та фаолият турлари ўсиш нуқталари этиб белгиланиши таъкидланди. Ушбу ўсиш нуқталари доирасида тадбиркорларга бир қанча имтиёзлар берилиши қайд этилди. Хусусан, Тахтакўпир, Бўзатов ва Шуманай туманларида иш бошлайдиган корхоналарга 3 йил муддатга солиқ ва божхона имтиёзлари берилиши маълум қилинди.
