Бухоро вилоятининг Шофиркон туманида Халқ депутатлари туман кенгашининг сессияси бўлиб ўтди. Унда туманда олиб борилаётган ишлар қониқарсиз деб топилиб, ҳудуд тадбиркорликни ривожлантириш бўйича “қизил” ҳудудда экани қайд этилди.
Туманнинг ёш ҳокими Шукрулла Ҳакимов йўл қўйилган камчиликлар учун аҳоли, Президент ва тадбиркорлардан кечирим сўради. Ҳоким йиғилишда сектор раҳбарлари билан биргаликда йил оҳирига қадар туманни ‘ўрта’ ҳудудга олиб чиқиш, 2021 йилнинг биринчи ярим йиллигида эса ‘яхши’ ҳудудга айлантиришни ваъда берди.
Шу ўринда, “Дарё” нашри томонидан эълон қилинган суратларда ҳоким тумандаги вазият ҳақида жон куйдириб гапириб, аҳолидан кечирим сўраётган вақтда, айрим масъуллар уҳлаб ўтирганликларини кўриш мумкин.
Маълумот ўрнида, Шукрулла Ҳакимов туманга шу йил февраль ойида ҳоким этиб тайинланган.
