Тошкент вилояти ҳокими Рустам Ҳолматов ўзига нисбатан ижтимоий тармоқларда билдирилган танқидларга муносабат билдирди. Ҳокимнинг муносабати вилоят ҳокимлиги матбуот хизмати томонидан эълон қилинди.
Ҳолматов тармоқларда у ҳақида ёзилаётган барча маълумотларни ўқиб боришини билдирган. Ҳокимнинг сўзларига кўра, у ерда фуқаролар томонидан ёзилаётганларнинг ҳаммаси ҳам ҳақиқат эмас.
“Мен ўз иш кунимни фуқароларни қабул қилишдан бошлайман. Мен қайси лавозимдан ишлашимдан қатъий назар шундай қиламан. Қабулимга келган барча фуқароларни қабул қиламан. Фуқаролар муаммоларини ҳал этишга кўпроқ вақт ажратишга ҳаракат қиламан”, – дейди ҳоким.
Таъкидлаш жоиз, сўнгги вақтларда фуқаролар ижтимоий тармоқларда ҳоким қабулига кира олмаётганини ёзишмоқда.
