Бош прокурор Ўзбекистонда иккита банкни бошқариб, катта миқдордаги пулларни талон-тарож қилган раҳбар ҳақида гапирди. Бу ҳақда бугун, 7 ноябрь куни мамлакатда коррупцияга қарши курашга бағишланган йиғилишда тўхталиб ўтилган.
Ниғматилла Йўлдошев йиғилишда «Халқ банки» ва «Микрокредитбанк»нинг собиқ раҳбари амалга оширган талон-тарожликлар ҳақида гапирди. Унинг айтишича, раҳбар Э. АҚШда яшириниб юрган жиноятчи билан тил бириктириб, мамлакатимизда уюшган жиноий гуруҳ тузган. Ушбу гуруҳ эса Ўзбекистондан 22,5 миллион долларни олиб чиқиб кетган. Шунингдек, Э. “Халқ банки”га раҳбарлик қилган вақтда банк биносини таъмирлаш учун ўзининг таниш фирмасини ўртага қўйиб, 5,5 миллиард сўмлик банк маблағини талон-торож қилгани маълум қилинди.
Шу билан бирга, Э. «Микрокредитбанк»га раҳбарлик қилганда ўзининг хонасига 100 млн сўмлик мебелни 273 млн сўмга олган. Э. шунингдек, банкнинг Сирдарё филиалига 700 млн сўмлик бинони 4 млрд 700 млн сўмга олиб, катта пулни ўмарган. Ҳозирда Э. ва унинг шериклари суд қилинаётгани маълум қилинди.
Маълумот ўрнида, Муродилла Ёқубович Эшматов 2019 йилда Микрокредитбанкга Халқ банкидан раҳбар бўлиб ўтган. У 2016-2019 йилларда Сирдарё вилояти ҳокимининг биринчи ўринбосари бўлиб ҳам ишлаган.
