Ўзбекистон президенти Шавкат Мирзиёев Қарши шаҳрида қашқадарёлик ёшлар билан учрашди. Бу ҳақда президент матбуот хизмати хабар қилди.
Маълум бўлишича, давлат раҳбари дастлаб Ёшлар марказида бўлиб, у ердаги шароит билан танишди ва шу ерда ёшлар билан учрашди. Пезидент ёшлар билан учрашувда улар билан очиқ мулоқот қилиш учун келганини айтди.
“Ҳамма ёшлар билан кўришишни хоҳлардим, лекин, афсуски, бунинг иложи йўқ. Сиз уларнинг вакиллари ўрнида жойлардаги муаммоларни, ёшлар истакларини айтишингизни истардим. Шунинг учун қўрқмасдан, ўз ота-оналарингга нима дейишни хоҳласаларинг, ҳамма фикрларингни бемалол айтинглар”, – деди Мирзиёев.
Учрашувда ёшларни иш билан таъминлаш, уларнинг муаммоларини ҳал қилиш, бўш вақтларини мазмунли ўтказиш масалалари очиқ муҳокама қилинди. Хусусан, Қашқадарёда ёшлар тадбиркорлигини қўллаб-қувватлашдаги ишлар суст эканлиги, уларни рағбатлантириш учун «Ёшлар – келажагимиз» давлат дастури бўйича янада қўшимча маблағлар ажратиш кераклиги айтилди. Мулоқотда Муборакда IT-park қуриш бўйича мутасаддиларга топшириқлар берилди. Шунингдек, мактаблардаги спорт заллар аҳволини яхшилаш, спорт зали йўқ мактабларда уларни қуриш учун Жисмоний тарбия ва спорт вазирлиги ҳисобидан 10 миллиард сўм ажратишга кўрсатма берилди.
Шунингдек, Китоб туманидаги муаммоли вазиятлардан бири ҳам ҳал этилди. Таъкидланишича, туманда 150 ўринга мўлжалланган мусиқа мактабида 310 нафар ўқувчи таҳсил олади. Давлат раҳбари ушбу муаммони ҳам ҳал этиб, ўқувчиларга етарли шароит яратиб бериш кераклигини таъкидлади.
