Чироқчидаги “Обод” МФЙ томорқачилари пиёз етиштиришга ихтисослаштирилади

Олий Мажлис Қонунчилик палатаси Спикери ўринбосари, O'zLiDeP фракцияси раҳбари Актам Хаитов Чироқчи туманидаги “Обод” маҳалла фуқаролар йиғини ҳудудидаги томорқасидан мўл даромад топаётган Жамшид Нарзуллаев, Ҳамдам Ширинов ва Нурали Кулобов хонадонларини кўздан кечирди. Уларга зарур тавсиялар берди. Лекин бу ҳудудда ер кўп-у, томорқадан ҳамма аҳоли ҳам унумли фойдаланмаётганини кўрсатиб ўтди. Етиштирилаётган озиқ-овқат маҳсулотлари тури кўп, миқдори кам. А. Хаитов қишлоқ одамлари билан суҳбатда бир маҳалла бир турдаги маҳсулот етиштиришга ихтисослашса, уни сотиш, харидор топиш осон кечишини тушунтирди.

-Бу ҳудудда пиёз етиштирилар экан, лекин кўчат Сурхондарёдан олиб келинади,- деди А. Хаитов. –Агар кўчат шу ернинг ўзида етиштирилса ва маҳалла пиёз етиштиришга ихтисослаштирилса, маҳсулотни экспорт қилиш ҳам осон кечади. Бу борада биз сизларга пиёз кўчати етиштириш бўйича тавсия бериш учун тошкентлик мутахассис Тойир Ботировни олиб келганмиз. Унинг тавсияларига амал қилсангиз, 10 сотих жойдаги пиёз кўчатидан 1 гектар пиёз етиштириш мумкин. Бу камида 80 тонна пиёз дегани.

Томорқачи-мутахассис Тойир Ботиров аҳоли вакилларига ўз тавсияларини берди. Озроққина жойда плёнка остида пиёз кўчати тайёрлаб, кенг майдонда пиёздан мўл ҳосил олиш технологияси ҳақида батафсил тушунча берди.

Қишлоқ аҳолиси ўз томорқаларида пиёз етиштириш ва уни экспорт қилиш бўйича берилган тавсияларга амал қилиш истагини билдиришди.