Кеча, 26 ноябрь куни давлатимиз раҳбари Шавкат Мирзиёев Қашқадарёга ташрифи давомида белгилаб берган вазифаларнинг ижроси юзасидан видеоселектор йиғилиши ўтказди. Бу ҳақда президент матбуот хизмати хабар қилди.
Йиғилишда президент вазирларнинг фаолиятини кескин танқид қилиб, улар ҳудудма-ҳудуд юриши кераклигини айтди.
“Қашқадарёда биронта соҳада 3,5 йил ичида биронта вазир, бош вазир ўринбосари натижа бермаган. Шу сабабдан ҳам Қашқадарё мана шу аҳволга тушиб қолган. Иккинчидан, ҳамма туман ҳокимлари, сектор раҳбарлари бир хил ишламаяпти, кўпи ишлашни хоҳламайди. Қашқадарёда мутлақо натижа йўқ. Йўлдаям, сувдаям натижа йўқ, сифат йўқ. Қишлоқ хўжалигида илм йўқ, ҳосилдорлик йўқ, пахтанинг нави йўқ. Қашқадарё мисолида биз кейинги йилга янги тизимга ўтишимиз керак. Вазирнинг Тошкентда ўтиришга нима ҳаққи бор? Мен ҳар сафар айтаман – вазир ҳафтада икки кун Тошкентда ўтириши мумкин. Қолган кунлари вилоятда бўлиши керак. У Ўзбекистон вазири-ку”, – дейди Шавкат Мирзиёев.
