Бухоро шаҳри прокурори тадбиркорнинг аризасидан сўнг вақтинча хизмат вазифаларини бажаришдан озод этилди. Бу ҳақда бош прокуратура хабар қилди.
Маълум бўлишича, Бухоро шаҳри прокурори Ж.Фозилов устидан ариза келиб тушган. Аризани тадбиркор ёзган. У ўз аризасида прокурор уни шаҳарда қурилган савдо марказидаги дўконнинг квадратини 5 млн. сўмдан (асли нархи 20 млн сўм) сотишга мажбур қилганини айтган. Шунингдек, прокурор 2020 йилнинг октябрида яна бир бошқа дўконни ҳам айни шу нархда сотишга мажбурлаганини билдирган. Лекин тадбиркор бунга рад жавобини бергач прокурор уни терговга чақириб, жавобгар қилиш билан қўрқитаётганлигини айтган.
Бош прокуратура ушбу ҳолат бўйича прокурорга нисбатан хизмат текшируви тайинланганини маълум қилди. Шунингдек, текширув холис ва адолатли бўлиши, у тўлиқ ўрганилиши ва ҳар қандай аралашувнинг олдини олиш мақсадида Фозилов 2 декабрь куни хизмат вазифаларини бажаришдан вақтинча озод қилингани маълум қилинди.
Текширув натижалари бўйича қўшимча маълумотлар тақдим қилиниши таъкидланди.
