Саидов ўзининг чиқиши давомида пандемия шароитида муҳожирлар катта зарар кўрганини айтди. Бундай вақтда уларга ёрдам бериш кераклигини таъкидлаб, ватандошларимизга ўша яшаётган мамлакатининг ўзида ёрдам бериш кераклигини айтган депутатни танқид қилди.
Спикер ўринбосари ушбу чақириқ билан айнан қайси депутат чиққанин очиқ айтмаслигини билдирган.
“Таклиф беришда ҳам ўйлаш керак. Хўш, Россияда бир кунлик яшаш харажатлари қанчага тушишини биласизми? Биз мигрантларга бундай пайтда ватанга қайтиш учун етарлича шароит қилиб беришимиз лозим. Мен депутатлардан ижтимоий тармоқлар орқали турли хил популистик чақириқлардан йироқ бўлишларини сўрардим”, – деган спикер ўринбосари.
Таъкидлаш жоиз, аввалроқ Миллий тикланиш партияси раҳбари Алишер Қодиров мамлакатимизда карантин айни кучайган вақтда хориждан ватандошларни олиб келишни тўхтатиш таклифини илгари сурган эди. У ўшанда хориждан ватандошларимизни олиб келишни тўхтатиш, уларни турган мамлакатларида даволанишларини молиялаштириш ҳақида ўйлашимиз кераклигини таъкидлаган эди.
Маълумот ўрнида, Акмал Садиов ўтган йили бўлиб ўтган сайловларда Миллий тикланиш партиясидан ўз номзодини қўйиб, депутатликка сайланган эди.
