“Сардоба иши” бўйича жиноят иши нима сабабдан ёпиқ тарзда кўрилаётгани маълум қилинди. Бу ҳақда EVERYDAY.UZ мухбири хабар қилди.
Маълум бўлишича, ушбу иш юзасидан 21 декабрь куни суд жараёни бошланган. Унда суд жараёни ёпиқ тарзда бўлиб ўтаёгани таъкидланди. Судда М. Холматов (“Ўзбекистон темир йўллари” АЖ “Гидротехник иншоотлар қуриш дирекцияси” бошлиғи лавозимида ишлаган) ва бошқалар (жами 17 киши) га нисбатан жиноят ишини кўриб чиқилмоқда. Судланувчилар ЖКнинг 167-моддаси (ўзлаштириш ёки растрата йўли билан талон-торож қилиш), 203-моддаси (сув ёки сув ҳавзаларидан фойдаланиш шартларини бузиш), 205-моддаси (ҳокимият ёки мансаб ваколатини суиистеъмол қилиш), 207-моддаси (мансабга совуққонлик билан қараш), 209-моддаси (мансаб сохтакорлиги) ва 258-моддаси (тоғ-кон, қурилиш ёки портлатиш ишлари хавфсизлиги қоидаларини бузиш) билан айбланмоқда.
Олий суднинг маълум қилишича, жиноят ишида давлат сирлари билан боғлиқ вазиятлар бўлганлиги сабабли у ёпиқ тарзда кўриб чиқилмоқда. Суд жараёни давом этмоқда.
