Андижон вилояти ҳокими Шуҳрат Абдураҳмонов давлат раҳбари билан мулоқотда 81 марта “мухтарам президент” деди. Бу ҳақда Газета.уз нашри хабар қилди.
Хабар қилинганидек, кеча 25 декабрь санасида давлатимиз раҳбари ёшлар Форумида иштирок этиб, мамлакатимиз ёшлари олдида турган муаммолар ва уларни ечиш йўллари ҳақида гапирди. Ўша тадбирда президент айрим вилоят ҳокимлари билан видеоалоқа орқали мулоқот қилди. Улар ўз навбатида ўз ҳудудларида амалга оширган ишлари юзасидан ҳисобот берди.
Андижон вилояти ҳокими давлат раҳбари билан мулоқот давомида ёшлар билан ишлаш, уларнинг бандлигини таъминлаш ва уларнинг муаммоларини ҳал қилиш борасида қилинаётган ишлар хусусида гапирди. Вилоят ҳокими ўз нутқи давомида жуда кўп марта “мухтарам президент” иборасини ишлатди. Газета.уз мухбирининг ҳисоб-китобига кўра, ҳоким президент билан мулоқот давомида 10 дақиқа 21 сония гапирган ва шу вақт ичида вилоят раҳбари 81 марта, ёки ҳар 7,6 сонияда бир марта ушбу иборани ишлатган. (Ҳокимнинг президент билан мулоқот матнини ушбу ҳаволада ўқишингиз мумкин. Рус тилида.)
Шундан сўнг Фарғона вилояти ҳокими Хайрулла Бозоров сўзга чиққан. У 12 дақиқа 35 сония давомида 22 марта (ҳар 34,3 сонияда бир марта) “мухтарам президент” деган.
