Кеча, 14 январь куни Ўзбекистон Президенти ҳарбий хизматчилар ва ҳуқуқни муҳофаза қилиш органлари ходимларидан бир гуруҳини ҳарбий унвонлар, орден ва медаллар билан тақдирлаб, мукофотларни топширди.
Ана шу унвон олганлар қаторида Тошкент шаҳар ИИББ бошлиғи Ташпулатов Азиз Анварович ҳам борлиги маълум бўлди. Бу ҳақда Шавкат Мирзиёев унвонни топширишдан олдин сўзлаган нутқида тўхталиб ўтди.
“Бугун иккинчи энг ёш генерал-майор унвонини синовдан ўтган Тошкент шаҳар ички ишлар бошқармаси бошлиғи Ташпулатов Азизга бердим. Бу ёшда бундай унвонни ҳеч ким олмаган. Нимага десангиз жонажон пойтахтимизнинг тинчлиги, осойишталиги, бу ички ишларнинг ҳамма ҳаракатларининг натижаси. Лекин бу биринчи қадам. Тошпулатовнинг олдига катта-катта вазифалар қўйдим”, – дейди Шавкат Мирзиёев.
Президент шунингдек, шу вақтгача Икрамов Азиз (ИИВ вазири ўринбосари – таҳр.) ушбу унвонни олган энг ёш генерал-майор бўлиб турганини қўшимча қилди. Маълумот ўрнида, Шавкат Мирзиёев Икрамовга Мудофаа вазири ўринбосари лавозимида ишлаган вақтида ушбу унвонни берган.
