Тошкент шаҳар ҳокимининг Юнусобод туманидаги «Универсам»да жойлашган 65 та тадбиркорга тегишли бино ва иншоотлар жойлашган 6 гектар ерни олиб қўйиш ҳақидаги қарори бекор қилинди. Бу ҳақда Олий суд хабар қилди.
Маълум бўлишича, ҳокимнинг 2018 йил 27 ноябрдаги «Ер майдонларида ободонлаштириш ва бузиш ишларини олиб бориш ҳақида»ги 1667-сонли, 2019 йил 31 декабрдаги «Urban developers» МЧЖ шаклидаги қўшма корхонасига ер майдонини ажратиб бериш ҳақидаги 1879-сонли ва Юнусобод туман ҳокимининг 2018 йил 18 декабрдаги «Тошкент шаҳар ҳокимининг 2018 йил 27 ноябрдаги қарори ижроси ҳақида»ги 2102-сонли қарорлари ҳақиқий эмас деб топилган. Ушбу қарорга кўра Юнусобод тумани Аҳмад Дониш ва Амир Темур кўчалари кесишмасида 65 та тадбиркорга тегишли бино ва иншоотлар жойлашган 6 гектар ер участкасини давлат ва жамият эҳтиёжи учун олиниши керак бўлган.
Жорий йил 27 январь куни ушбу иш бўйича Тошкент туманлараро маъмурий судида якуний қарор чиқарилган ва унинг натижасига кўра ҳоким қарорлари ҳақиқий эмас деб топилган.
Маълумот учун айтиш жоизки, «Уй рўзғор моллари» МЧЖ, «Нур цехри ошиёни» МЧЖ, «Зар-зийнат бизнес» МЧЖ, «Саида-барока» ХК, «Glorius justice» МЧЖ, С. Росошанская ва «Эмисун маркет» ХКлар ушбу иш юзасидан судга мурожаат қилган бўлган.
