Ўзбекистонда коронавирус тарқалишининг олдини олиш мақсадида махсус комиссиянинг йиғилиши бўлиб ўтди. Унинг натижасига кўра бир неча қарорлар қабул қилинди.
Хусусан, эндиликда мамлакатимизда Россиянинг “Спутник V” вакцинасини рўйхатдан ўтказиш жараёнини бошлаш мумкинлиги маълум қилинди. Бунга ушбу вакцинанинг учинчи босқич клиник синовлари якуни бўйича берилган таҳлил асос қилиниб олинган. Шунингдек, 2020 йил декабр ойидан буён Ўзбекистонда Хитойнинг “Zhifei Longcom Biopharmaceutical Co.,Ltd” компанияси томонидан ишлаб чиқилган коронавирусга қарши “ZN2001” вакцинаси 7 минг нафардан ортиқ кўнггиллида синаб кўрилгани, унинг натижасига кўра бирорта фуқарода вакцинанинг ножўя таъсир кузатилмагани маълум қилинди.
Шу билан бирга, махсус комиссия йиғилишида мамлакатимизда аҳолини коронавирусга қарши эмлашда алгоритми ва алоҳида тартибини ишлаб чиқиш бўйича топшириқ берилгани таъкидланди. Шунингдек, қуйидаги шахслар биринчи навбатда эмланадиган аҳоли тоифалари экани маълум қилинди.
65 ёшдан ошган қариялар ва кексалар;
сурункали касалликлари бор шахслар;
тиббиёт ходимлари;
мактаб ва мактабгача таълим ташкилотлари ҳамда олий таълим муассасалари ходимлари;
аҳоли билан бевосита мулоқотга киришадиган ҳуқуқни муҳофаза қилувчи органлар ходимлари.
Йиғилишда Ўзбекистонда концертларда томошабинлар жойлашувчи юзасидан ҳам янги тартиб қабул қилинди. Унга кўра, томошабинлар иккита ёнма-ён ўриндиқда жойлаштирилиб, ҳар учинчисини бўш қолдириш тартиби жорий қилинди. Шунингдек, Германия билан авиарейслар қайта тикланадиган бўлди. Маълумот ўрнида, 2020 йил 21 декабрда Германия билан авиарейслар тўхтатилган эди.
