Фарғона шаҳрида кўп қаватли уйлар орасидаги барча қурилишлар тўхтатилади. Бу ҳақда вилоят ҳокимлиги хабар қилди.
Маълум бўлишича, ҳоким шаҳардаги кўп қаватли уйларга бориб, у ердаги аҳоли билан учрашган. Учрашув давомида болалар учун ўйнайдийган, сайр қиладиган жойлар қолмагани маълум бўлди. Шундан келиб чиқиб, ҳоким Хайрулло Бозоров кўп қаватли уйлар орасидаги барча қурилишларни тўхтатиш бўйича топшириқ берган. Қурилиши якунланиб қолган бинолар эса қонунийлиги ўрганилади. Шунингдек, қурилиш бўйича чиқарилган барча қарорлар бекор қилинади. Тадбиркорларга бошқа жойлардан ер ажратилади.
Шунингдек, қурилиш эгалари кесган ҳар бир дарахти учун 100 тупдан манзарали дарахт экади ва “дом”лар орасидаги барча болалар ҳамда спорт майдончалари қайта тикланади. Ўрганишлар давомида Мотуридий кўчасидаги ариқ устига бинолар қурилгани ҳам маълум бўлган. Улар бузиб ташланади ва ариқ атрофида велосипед миниш ҳамда сайр қилиш учун экойўлак ташкил этилади.
