Сенат раиси Танзила Норбоева “Америка овози” (VoA)га интервью берди. Интервью давомида Норбоева Ўзбекистон парламентининг фаолияти ҳақида гапирди.
Раис парламент президентга бўйсунади деган гаплар ҳақиқатга тўғри келмаслигини таъкидлади. Норбоева авваллари қарор қабул қилишда президент билан маслаҳатлашилганини тасдиқлаб, ҳозирда ҳаммаси бошқача эканини айтди. Сенат раҳбари Сардоба сувомбори билан боғлиқ ҳолатни эслаб, шундай деди: “Илгари парламентга энергия тизими ёки Сардобани ўрганишга ким йўл берган? Биз ўрганиб чиқдик, муҳокама қилиш учун воқеа жойига бордик, жавобгарларни сўроқ қилиш учун чақирдик, кўрсатмалар бердик. Бу парламент мустақиллигининг натижаси эмасми?”
Сенат раиси авваллари муаммоли вазиятлар ва соҳаларни ўрганишга йўл қўйилмаганини айтди. Бугунги кунда эса аҳоли муаммоларини ўрганиш ва уларни ҳал қилишга тўсиқ йўқлиги таъкидланди. Танзила Норбоеванинг сўзларига кўра, Сенат халқ учун ишламоқда. У парламентга босим кузатилмаётганини айтди. Раис Президент администрацияси ва Қонунчилик палатаси қарорларидан тўлиқ мустақил эканини таъкидлади. Норбоева бунга ўтган йили 6 та қонун рад этилганини мисол қилиб келтирди.