Қирғиз Республикаси Президенти Садир Жапаров Ўзбекистонга келди. Бу ҳақда EVERYDAY.UZ мухбири хабар қилди.
Маълум бўлишича, Жапаровни Тошкентдаги аэропортда Ўзбекистон Бош вазири Абдулла Арипов кутиб олган. Шунингдек, Қирғиз Республикаси Президенти матбуот хизмати томонидан эълон қилинган суратда Жапаровни кутиб олиш маросимида Ташқи ишлар вазири Абдулазиз Комилов ва Тошкент шаҳар ҳокими Жаҳонгир Ортиқхўжаев ҳам қатнашганини кўриш мумкин.
Эслатиб ўтамиз, Жапаров 11-12 март кунлари Ўзбекистонда давлат ташрифи билан бўлади. Ташриф давомида икки давлат ўртасидаги дўстлик, яхши қўшничилик ва стратегик шериклик муносабатларини янада ривожлантириш ва мустаҳкамлаш масалаларининг барча йўналишларини кўриб чиқиш режалаштирилган.
Икки мамлакат етакчилари учрашувининг кун тартибидан конструктив сиёсий мулоқотни давом эттириш, савдо, саноат, транспорт, энергетика, қишлоқ ва сув хўжалиги соҳаларида кўп қиррали ҳамкорликни кенгайтириш, парламентлараро ва ҳудудлараро алоқаларни фаоллаштириш, маданият, соғлиқни сақлаш, таълим ва туризм борасидаги қўшма дастурларни амалга оширишнинг долзарб жиҳатлари ўрин олган.
Халқаро сиёсат ва минтақавий ҳамкорлик масалалари юзасидан фикр алмашилади.
Музокаралар якунида давлат раҳбарларининг Қўшма баёноти қабул қилиниши, шунингдек, икки томонлама муносабатларнинг турли йўналишларига алоқадор қатор ҳукуматлараро ва идоралараро ҳужжатлар имзоланиши кўзда тутилган.
Ташриф дастурига мувофиқ Қирғизистон Президенти Ўзбекистон Республикаси Олий Мажлисининг иккала палатаси раҳбарлари ва Бош вазири билан ҳам учрашувлар ўтказади, мамлакатимиз саноат корхоналари фаолияти билан танишади.
