Жиззах вилояти ҳокимининг собиқ ўринбосари Акрам Раҳмонқулов ва унинг 10 нафар жиноий шериклари қамоққа олинган. Бу ҳақда бош прокурор Ниғматилла Йўлдошев айтиб ўтди.
Маълум бўлишича, ҳокимнинг собиқ ўринбосари 2018—2020 йилларда жами 494 млрд сўмлик 82 та объектда қурилиш-таъмирлаш ишларини ўзига тегишли 9 та пудрат ташкилотига топшириб, қурилиш ишлари ҳажмини сунъий равишда оширилган нархларда расмийлаштириб, қўшиб ёзган ва шу орқали қарийб 20 млрд сўмлик бюджет маблағларини талон-торож қилган. Йўлдошев ушбу ҳолат терговда ҳозиргача аниқ бўлгани эканини айтди.
Бош прокурор собиқ ҳоким ўринбосарининг корхоналарида 12 млрд сўм пул, Жиззах шаҳридаги «Эски шаҳар» буюм бозорида 172 та савдо дўкони, кўп қаватли уйларда 14 та хонадон, 43 та автомашина, 37 та бошқа кўчмас мулклар борлиги аниқланганини қўшимча қилди.
Хабар қилинишича, Акрам Раҳмонқулов ва унинг 10 нафар жиноий шериги қамоққа олинган ва ҳозирда тергов ҳаракатлари олиб борилмоқда.
Эслатиб ўтамиз, Раҳмонқулов 2020 йил ноябрь ойида лавозимидан озод этилган эди.
