Суҳбат давомида икки давлат раҳбарлари бир-бирларини Рамазон ҳайити табриклади. Шунингдек, мулоқотда икки давлат ўртасида ҳамкорликнинг ривожланиб бораётгани алоҳида қайд этилди.
Хусусан, турли даражаларда ўзаро алмашинув ва мулоқотлар фаоллашди. Жорий йил бошидан товар айирбошлаш 40 фоизга ортди, 164 та янги қўшма корхона ташкил этилди, ҳудудлар ўртасида ҳамкорлик йўлга қўйилмоқда. Самарқанд шаҳрида Туркия консуллиги ўз ишини бошлади. Қўшма маданий-гуманитар дастурлар, шу жумладан таълим, кинематография ва спорт соҳаларида амалга оширилмоқда, – дейилади ахборотда.
Шунингдек, матбуот хизмати хабарида июнь ойида Тошкентда Савдо-иқтисодий ҳамкорлик бўйича ҳукуматлараро комиссиянинг навбатдаги йиғилиши ҳамда бизнес-форум ўтказилиши ҳам маълум қилинган.
Президентлар мулоқот давомида халқаро сиёсат масалалари юзасидан ҳам фикр алмашди. Хусусан, Шарқий Қуддусдаги вазият муҳокама марказида бўлди.
Президентлар Шарқий Қуддусдаги вазиятнинг кескин тус олиши муносабати билан чуқур хавотирда эканликларини билдирдилар. Фаластин-Исроил муаммоси халқаро ҳуқуқ нормаларига мувофиқ, Бирлашган Миллатлар Ташкилоти Хавфсизлик Кенгаши томонидан аввал қабул қилинган резолюциялар асосида тинч йўл билан ҳал этилиши лозимлиги қайд этилди, – дейилади матбуот хизмати томонидан тарқатилган ахборотда.
